ઊંઘ્યો છું - ઉવૈસ ગિરાચ

તમને આપીને ઘાટ, ઊંઘ્યો છું
એટલે ઘસઘસાટ ઊંઘ્યો છું

મારા વિચારો! શાંત થઈ જાઓ,
મૂકી દો કલબલાટ, ઊંઘ્યો છું..

સ્વપ્ન પણ હીંચકે ચડ્યા મારા,
ચાલુ હિંડોળે ખાટ ઊંઘ્યો છું!

કેવું દુઃખ છે કે જેમાં સુખ પણ છે,
તારો લઈને ઉચાટ ઊંઘ્યો છું!

ધૈર્યનું એક ઉદાહરણ છે આ,
મનમાં રાખી બફાટ ઊંઘ્યો છું.

જાગી જાગીને રાત કાઢી છે,
જોઈ જોઈને વાટ ઊંઘ્યો છું.

- ઉવૈસ ગિરાચ 

અઘરું છે ભૈ - અશોક જાની ‘આનંદ‘

પડછાયાની પાછળ પડવું અઘરું છે ભૈ,
કિસ્મતના માથા પર ચઢવું અઘરું છે ભૈ.

તારો રસ્તો તારી જાતે શોધી લેજે,
રાહ જોઈને પાછા વળવું અઘરું છે ભૈ.

મન મર્કટ તો કૂદકા મારે આડા તેડા,
એના ચક્કરને આંતરવું અઘરું છે ભૈ.

પરચમ તારો ભીનો છે મદના વરસાદે,
ભાર લઈને અહીં ફરફરવું અઘરું છે ભૈ.

જાત વગર કોઈ આરો નહી એ વાત ખરી છે,
ખુદ ખોવાઈ ખુદને જડવું અઘરું છે ભૈ.

તારી મૂડી તારી સાથે લઈને જાજે,
પાપ પુણ્યના ઝોલા ભરવું અઘરું છે ભૈ.

દોડી દોડી માંડ સરોવર કાંઠે આવ્યા,
સામે પાણી ને તરફડવું અઘરું છે ભૈ.

મન કરતાલ, મંજીરાં બાજે તો છે 'આનંદ',
તાલ વિના લ્યા અહીં રણઝણવું અઘરું છે ભૈ.

- અશોક જાની ‘આનંદ’

કશુંય આખરી ક્યાં છે - રઈશ મનીઆર

કશુંય આખરી ક્યાં છે સતત ઝુરાપા સિવાય
દરેક મુકામ બીજું કંઇ નથી વિસામા સિવાય

મળ્યો છે તમને પ્રતિષ્ઠાનો એક પરપોટો,
કરો જતન હવે છૂટકો નથી ટકાવ્યા સિવાય.

સફળતા અલ્પજીવી ને પ્રલંબ જીવનપંથ,
અભાગી છે, ન મળે જેને સુખ સફળતા સિવાય.

સંબંધમાંથી સમય ખાસ કંઇ હરી ન શક્યો
બધું જ જેમ હતું તેમ છે, ઉમળકા સિવાય.

બહુ ઉમંગ હતો જગમાં કૈંક કરવાનો,
જગે કશું જ ન કરવા દીધું કવિતા સિવાય.

કહી દો વ્યસ્ત છું એના જ આ તમાશામાં
મળી શકે તો મળે ત્યાગ કે તપસ્યા સિવાય.

– રઈશ મનીઆર

સુખમાં લખું - વિકી ત્રિવેદી

સુખમાં લખું જો શેર તો કંઈ શેરિયત નથી
યાને હજુ મને આ કલા હસ્તગત નથી

એવું નથી કે આ વ્યથા એવી સખત નથી
પણ જોઈ લઈશ કેમ કે પહેલી વખત નથી

ભગવાન, તારા સ્વર્ગમાં તું ડાકઘર બનાવ
કે મારી મા તરફથી હજુ કોઈ ખત નથી

બેઘર જો હોત તો તમે પીડા કળી શકત
કિન્તુ અહીં દીવાલ છે ને ફક્ત છત નથી

કંઈ કર્ણ જેવી વેદનાનું કર્જ બાકી છે
અફસોસ કિંતુ મારે કોઈ સલ્તનત નથી

- વિકી ત્રિવેદી

ચૂમે છે ~ રવિ દવે 'પ્રત્યક્ષ'

એ પ્રથમ તો લગાર ચૂમે છે;
તે પછીથી ધરાર ચૂમે છે.

મારા હોઠોને પારિતોષિક દો;
કેવા મીઠા પ્રહાર ચૂમે છે!!

જાણે ખંજર હુલાવી નાખ્યું હો;
એમ દઈને તું ભાર ચૂમે છે.

તું ચૂમે છે તો એમ લાગે કે-
મારો પરવરદિગાર ચૂમે છે.

એમ સ્પર્શે છે તારા હોઠ મને;
જાણે ચાકુની ધાર ચૂમે છે.

~ રવિ દવે 'પ્રત્યક્ષ'

इश्क़ में - मुनव्वर राना

इश्क़ में राय बुज़ुर्गों से नहीं ली जाती
आग बुझते हुए चूल्हों से नहीं ली जाती

इतना मोहताज न कर चश्म-ए-बसीरत मुझको
रोज़ इम्दाद चराग़ों से नहीं ली जाती

ज़िन्दगी तेरी मुहब्बत में ये रुसवाई हुई
साँस तक तेरे मरीज़ों से नहीं ली जाती

गुफ़्तगू होती है तज़ईन-ए-चमन की जब भी
राय सूखे हुए पेड़ों से नहीं ली जाती

मकतब-ए-इश्क़ ही इक ऐसा इदारा है जहाँ
फ़ीस तालीम की बच्चों से नहीं ली जाती.

- मुनव्वर राना

દુનિયાની અટકળોનો ઉત્તર - સંદીપ પૂજારા

દુનિયાની અટકળોનો ઉત્તર બની શકે છે!
કોઈ માનવી જો ધારે, ઈશ્વર બની શકે છે!

પોતાનું અડધું ચીભડું જે બુદ્ધને ધરી દે,
કાંઈ ન હોય તો પણ સદ્ધર બની શકે છે!

દાતા ઘણા હશે પણ એવા તો સાવ થોડા,
કોઈની ગરીબી 'પી'ને શંકર બની શકે છે!

જે પણ મળ્યું હો એનો સંતોષ રાખે ને, તો
હર કોઈ સ્મિત પહેરી સુંદર બની શકે છે!

વાતોની સાથે સાથે કાર્યોય જેના સારા,
એનું જીવન ખરેખર અવસર બની શકે છે!

~ સંદીપ પૂજારા

પડકાર ફેંકે છે - સંજુ વાળા

કદી સ્થિતિ કદી સમજણ નવો પડકાર ફેંકે છે
કદી ભીતરની અકળામણ નવો પડકાર ફેંકે છે

નિરંતર કાળની કતરણ નવો પડકાર ફેંકે છે
ક્ષણેક્ષણ આવનારી ક્ષણ નવો પડકાર ફેંકે છે.

અચાનક એક લક્કડખોદ આવી છાતી પર બેઠું
શરીરે ઉપસી આવ્યા વ્રણ નવો પડકાર ફેંકે છે

કબૂતર જેવી મારી લાગણીને ચણ બતાવી 'ને
અજાણ્યા મ્હેલનું પ્રાંગણ નવો પડકાર ફેંકે છે

ઉખેડી મૂળથી વાચા પછી આદેશ આપ્યો : 'ગા'
આ શસ્ત્રોહીન સમરાંગણ નવો પડકાર ફેંકે છે

હવે એકેય લીલું પાંદડું બાકી બચ્યું છે ક્યાં ?
છતાં આ ભોમનું વળગણ નવો પડકાર ફેંકે છે

હજુ નવનાથ, દામોકુંડ, કેદારો, તળેટી-ટૂક..
હજુ કરતાલની રણઝણ નવો પડકાર ફેંકે છે

~ સંજુ વાળા

જરૂરી ચીજવસ્તુઓ ઘરે લાવી નથી શકતો

જરૂરી ચીજવસ્તુઓ ઘરે લાવી નથી શકતો
હું કેવો બિનજરૂરી છું એ છુપાવી નથી શકતો

બચ્યાં છે જેટલાં સગપણ, બધાં દ્રષ્ટિ વગરનાં છે
ઇશારાથી હવે કોઈને સમજાવી નથી શકતો

ઋતુનો દોષ છે, માળીના માથે ના તમે નાખો
ઉગાડે ફૂલ માળી, એને કરમાવી નથી શકતો

તમે જો હાવભાવોથી હવે સમજો તો સારું છે
જરૂરિયાત છે પણ હાથ લંબાવી નથી શકતો

અમારે તો ફકત બસ પૂછવું છે એક સરનામું
કોઈ રસ્તે જનારાને હું અટકાવી નથી શકતો

~ હર્ષ બ્રહ્મભટ્ટ