ખૂબ મુશળધાર છે વરસાદ, છત ચૂવા કરે છે.
મા મને પાલવમાં સંતાડી સતત દુવા કરે છે.
પ્રેમથી જો મા કશું બાંધે તો એ શ્રદ્ધા જ બાંધે,
માદળિયા-બાદળિયા એ બધું તો ભૂવા કરે છે.
એક ખોબા જેટલું બાળકનું નાનું પેટ ભરવા,
મા ઘણીયે વાર ખુદના પેટમાં કૂવા કરે છે.
હાથ, પાલવ બેઉ પોતાના ને પોતાની જ આંખો,
બીજું તો ક્યાં કોઈ એનાં આંસુઓ લૂવા કરે છે.
આંખમાં એણે મને આંજ્યો છે ક્યાંથી ઊંઘ આવે?
મા નહીંતર ખુદ પ્રયત્નો તો ઘણા સૂવા કરે છે.
- અનિલ ચાવડા
ટિપ્પણીઓ નથી:
ટિપ્પણી પોસ્ટ કરો