આવ્યાં તમે તો લાગ્યું સઘળે વસંત જેવું

વર્ષોથી ઘર હતું આ મારું અપંગ જેવું,
આવ્યાં તમે તો લાગ્યું સઘળે વસંત જેવું.

માણસ મટીને પળમાં હું થઈ ગયો સરોવર,
ને રોમરોમ ઊઠ્યું જાણે તરંગ જેવું.

બારી, કમાડ, ફળિયું ને એકએક નળિયું,
ઊજવી રહ્યાં છે ખુદમાં કોઈ પ્રસંગ જેવું.

લઈ ઝીર્ણશીર્ણ પર્ણો ઊભું હતું ખખડધજ,
એ વૃક્ષથી અચાનક ટહુક્યું વિહંગ જેવું.

ઊઘડી રહ્યું છે ચારેબાજુ ઉમંગ જેવું,
આવ્યાં તમે તો લાગ્યું સઘળે વસંત જેવું.

- અનિલ ચાવડા

આ ગઝલનું પઠન પણ સાંભળોઃ