જીવ્યા

સ્હેજ અમસ્તું જળમાં જીવ્યા સ્હેજ અમે વાદળમાં જીવ્યા;
આ બંનેમાં ફાવ્યું નહિ તો છેવટ જઈ ઝાકળમાં જીવ્યા.

પ્હાડ, ખીણ, પથ્થરમાં જીવ્યા, એમ અમે ઈશ્વરમાં જીવ્યા,
વળાંક લઈને વહી રહેલા ઝરણાની ખળખળમાં જીવ્યા.

ક્ષણેક્ષણે અટકળમાં જીવ્યા, આ તે કેવા છળમાં જીવ્યા?
અમે અમારું સઘળું લઈને માત્ર તમારી પળમાં જીવ્યા.

પંખી-ટહુકા, ઝાડ-ડાળ ને મૂળ-બૂળ ને તળમાં જીવ્યા,
ઊગું ઊગું માટીમાં કરતી નાનકડી કૂંપળમાં જીવ્યા.

કોઈ અચાનક આવી મારા શ્વાસોમાં ઢોળી દે શાહી,
યુગોયુગોથી એ જ ધારા અમે એક કાગળમાં જીવ્યા.

- અનિલ ચાવડા

આ ગઝલનું પઠન પણ સાંભળોઃ